Fundargerðir kjörstjórna
Til og með árinu 1903 voru alþingiskosningar opinberar samkomur, eiginlegir kjörfundir, þar sem kjósendur gengu fyrir kjörstjórn og lýstu í heyranda hljóði hvern eða hverja þeir kusu. Á árunum 1874–1903 var í hverju kjördæmi þriggja manna kjörstjórn sem sá um framkvæmd alþingiskosninga og voru sýslumenn sjálfkrafa formenn kjörstjórna (kjörstjórar) í sínum sýslum. Kjörstjórn bar að færa fundargerð kjörfunda og senda staðfest afrit hennar síðan til landshöfðingja.
Í þessum viðauka eru fundargerðir kjörfunda við alþingiskosningar (bæði almennar kosningar og aukakosningar) og er þeim raðað eftir kjördæmum í aldursröð. Um frágang stafrænna afrita og fundargerðir sem vantar má lesa nánar í almennum skýringum með þessum vef (sjá lið nr. 5).